Пры газеце “Чырвоная Полаччына” паэты і празаікі, згуртаваўшыся, арганізавалі па ініцыятыве А. Александровіча Полацкую філію сталічнага аб’яднання “Маладняк”.
Напачатку Полацкую філію ўзначаліў А. Дудар, пасля яго паслядоўна змянялі на гэтай пасадзе А. Звонак, В. Сянкевіч, С. Хурсік, Т. Хадкевіч.
Першае пасяджэнне філіі адбылося 17.03.1925 года на базе студыі пры Полацкім педтэхнікуме. У розны час у філію ўваходзілі вядомыя зараз літаратары: А. Александровіч, П. Броўка, В. Маракоў, Я. Скрыган, С. Сямашка і інш.
У лістападзе 1926 года выйшаў першы нумар альманаха “Наддзвінне”, які стаў літаратурнай візіткай полацкага “Маладняка” і які даў назву ўзноўленаму пасляваеннаму згуртаванню полацкіх літаратараў. У першым нумары альманаха былі надрукаваны паэма А. Александровіча “На мяжы”, першыя вершы Петруся Броўкі, творы Тараса Хадкевіча і Сымона Хурсіка. У гэтым жа нумары з’явіліся першыя два вершы паэта і празаіка Яна Скрыгана, верш паэта-пачаткоўца, нашага земляка, Мікалая Сямашкі (“Люблю свой край”) і паэтычныя творы настаўніка з Ветрына Уладзіміра Яцкевіча...
Полацкія маладнякоўцы наладжвалі літаратурныя вечары з удзелам Я. Купалы, М. Чарота, З. Бядулі і іншых беларускіх пісьменнікаў.
Сталічнае літаратурнае аб’яднанне “Маладняк” праіснавала толькі пяць гадоў: у лістападзе 1928 года яно ў выніку рэарганізацыі было ператворана ў БелАПП, а Полацкае аб’яднанне літаратараў стала яго філіяй. Яна і з’явілася тым вытокам, ад якога пачалося “наддзвінскае” цячэнне ў дзень сённяшні...
Па-сапраўднаму і надоўга “Наддзвінне” абнавіла сваю дзейнасць толькі пасля Вялікай Айчыннай вайны. Яго ўзначаліў быўшы партызан і франтавік Алесь Савіцкі...
Ішоў час. Мяняліся падзеі, людзі і ... кіраўнікі “Наддзвіння”. Гэта былі энергічныя і самаадданыя літаратары: Алесь Савіцкі, Валянцін Лукша, Юрый Лужын, Навум Гальпяровіч, Іван Стадольнік, Міхась Барэйша, Юрась Касцюк, Герман Кірылаў, Лера Сом і Мікалай Балдоўскі.
У 1995 годзе літаб’яднанню, якое на той час узначальваў журналіст Юрась Касцюк, было прысвоена ганаровае званне”народнае”, а ў 1997 годзе за першынство ў Першым Усебеларускім фестывалі “Беларусь – мая песня” “Наддзвінне” адзначана дыпломам лаўрэата і грашовай прэміяй.
Зараз літаратурнае аб’яднанне налічвае дваццаць дзевяць чалавек і дзейнічае пад кіраўніцтвам М.Балдоўскага.